Decreto 20 Lujo 2000 del Governo dei Veneti

Decreto lexe so £a prostitusion e norme urjenti pa £a Justisia

Borborico el 19/07/2000

Inte £a riunion de’l Governo Autonomo del Popo£o Veneto xe sta meso in
discusion el problema de£a prostitusion, par pore un limite ai dixagi de
chi se prostituise, pa’l rispeto dea nostra cultura e mora£, pa no
parmetare altro £a sciavoneria e i reati contro i diriti umani.

DECRETEMO

Ogni prestasion persona£ co raporti sesua£i fata a pagamento ga da
oservare £e regoe cuà scrite:

1) chi voe ofrire prestasion sesua£i a pagamento ga da dirlo al
Tribuna£ del popoeo Veneto dixendo i locai o loghi a dispoxision par ste
prestasion; i locai pa sto mestiero ga da esare a posto e rispetar tute £e
regoe de igiene e de riservatesa de na fameja;

2) Xe proebia cualsiasi mediasion de tersi (rufiani, sfrutatori o magnaci)
tra el/£a prestante e el/£a cliente;

3) Xe proebia cualsiasi forma de invito a prestasion sesua£i a pagamento
in loghi adibii a uxo publico (bar, alberghi, aeroporti, stasion, strade,
ospedai ecc);

4) El/£a prestante xe obligà de sotoporse a controi sanitari mensii mirai
pa £e ma£atie contajoxe co trasmision sesua£e; inte’l caxo al contro£o
el/£a prestante £a rixulta ma£à de ste ma£atie e£ora el/£a ga da
sospendare £e so prestasion fin che a n’altro contro£o el/£a rixulta che
el/£a xe guario/a;

5) Xe proebio de dare e de risevare prestasion sesua£i pagae a chi che ga
manco de disdoto ani ;

6) £e prestasion sesua£i £e xe sojete a£a norma£ tasasion, e come tute £e
prestasion ga da pagare £a inposta fisca£ drio dimanda de codice I.S.. se
£a xe na prestasion de mestjero;

No oservare ste regoe xe reato e £a pena stabi£ia xe de £a detension co £a
partecipasion a dei lavori de comunità par sie mexi, ma a seconda de£a
gravità dei dani cauxà el judice poe dispore na pena pì granda.

In sti caxi e in tuti i caxi de vio£asion de lexe veneta inte’l teritorio
dei Veneti, el Prexidente del Tribuna£ del Popo£o Veneto o el so sostituto
poe fare ordinansa de fermo pa cuarantaoto ore se xe necesario pa fermar
£a vio£asion. £a carcerasion oltre sto tenpo po£ esare decixa so£o da na
giuria dopo un proceso rego£à secondo de£e lexi venete, manco che inte’l
caxo de ripetision de’l reato o pa fati de sopresion de diriti umani.

Version confermà par £a publicasion ufisia£ – Franceschi Luciano